泰廚泰國菜館 (旺角) - 食正嘅泰菜唔一定要去九龍城！
沙華弟給！如果第一時間叫你諗起食泰國菜嘅地方，可能你會諗起九龍城！無錯！雖然我都係😂哈哈哈。。 不過今日小編就同一位有人嚟到旺角呢一間其實都幾出名嘅泰國餐廳試試佢！
位於旺角金魚街呀佢，位置方面唔使講！正！好彩事先有book位，小編大約八點半左右嚟到餐廳，咁啱有張二人枱，所以唔使等位，但係我哋坐低之後，已經全場爆滿。
由於都餓啦，所以好快睇完餐單就落咗order啦，連Menu都影唔切！小編同友人分別帶咗一杯龍眼冰同埋椰汁冰，兩杯嘅味道都唔錯唔會太甜，絕對係食泰菜嘅最佳飲品之一。
第一道先來嘅菜係生菜包，見到佢嘅份量唔算多，生菜大約有八至十塊左右，但係呢個份量係絕對足夠二至三人食用嘅。生菜唔算太大塊，但係就都幾新鮮，而肉碎亦都有少少香辣嘅感覺，非常開胃，生菜包可謂食泰國菜亦都係必要嘅菜式之一。
近鏡睇睇，如果生菜再大塊啲就比較好，但係而家成樣野個感覺都唔錯，幾好食！
麗都第二道菜係炒金邊粉，相信炒金邊粉亦都大部份人鍾意食泰國菜嘅話都係必叫嘅菜式之一，而呢度嘅炒金邊粉都炒得都唔錯，不過唯一有少少可以改善嘅地方就係可以炒濕少少，因為而家相對太乾身，但味道唔錯，唔會辣，有少少酸酸地咁，又係開胃嘅！
食泰菜又點可以唔食咖喱呢，當晚小編同友人就選擇左一個泰式咖喱雞，呢個咖喱唔辣，味道相對比較甜，入邊亦都包括青椒洋蔥等材料，同平時食嘅咖喱有少少分別，係適合唔識得辣嘅朋友嘅。由於已經有叫一個粉麵，所以我哋選擇咗叫一份薄餅去配合咖喱一齊食，好似有少少印度風味咁！呢個薄餅都做得唔錯，唔會太油膩，適合配返咖喱一齊食。
最後呢道菜就係呢個串燒，呢個真係小編高度誠意強烈推薦大家一定必食嘅嘢！雖然餐廳嘅串燒只係得雞同豬嘅選擇，但係就已經足以滿足各位嘅串燒迷！首先係佢燒得好入味，無論係雞定豬，啲肉都比較嫩，唔會太硬，再配合埋外面嘅沙嗲醬汁，真係無得輸，大家食過就會明白我喺度講緊乜！但係如果要揀雞定豬，小編係會揀計，因為雞比較入味，肉質亦都比較亂，係好食過豬嘅！🙈一定必食！而餐廳嘅門口其實亦都可以只係買串燒做外賣咁食👍🏿價錢一樣，都係＄12一串👍🏿
最後，餐廳亦都做緊一個一蚊雞嘅優惠，小編就揀咗呢個椰汁糕做甜品作呢餐飯嘅尾聲，呢個甜品就不過不失啦，面頭有好重嘅椰汁，而中間嘅位置亦都有好多西米同埋粟米一齊，都好有傳統泰國嘅甜品食品風味，所以用呢個來做結尾，真係滿足晒啦！
總結係，強烈建議大家如果真係決定去呢度食，可以先book位，因為餐廳嘅面積唔算大，但係就都幾受歡迎，所以等位嘅話可能都要等一段時間，大家不妨去試吓啦😋
沒有留言:
張貼留言