米路帶你食好西 (Eat Good West with MILO): 新蒸武門 (觀塘) - 蒸煮新體驗食出食材的鮮味用心製作

今日黎到呢間位於觀塘一工廈內既餐廳食晚飯，餐廳名其實都已經有d吸引，因為本身小編同友人都以為係食蒸汽火鍋果d黎，點知係完全同佢無關😂

哈哈，禁當然可能係小編見識少啦🙈另外，雖然小編都係一位90後，但都知道香港以前有套好鬼出名既武打電影，係叫 "新精武門"~ 唔通呢間野係用呢套電影做主題？哈。。又係完全無關🙈😂

好啦講返正題，呢間餐廳個位置非常方便好搵，位於觀塘駱駝漆大廈三座一樓既佢，再加埋佢係餐廳入口有大大隻既餐廳名果d，基本上係一定搵到👍🏿

入到餐廳啦！入面環境都幾有私房菜既感覺，枱既數目唔太多，所以坐低既時候都唔會覺得環境好擠迫。同時比較簡潔既環境設計，進食環境係舒適既。

坐定定之後就睇下menu有咩食先，今日小編同友人係去食晚飯，所以上面果張午市套餐係無法使用既，但影低都供大家參考，其實午市都可以考慮黎試試架🤓

而佢晚市既正常餐廳都有一本餐單，入面並唔係每道菜都有一幅相，但有相既都會係餐廳主打同賣點😉👍🏿

<是日燉湯 : $38>

開始了！當晚小編同兩友人一共3人去食晚飯。首先，每人叫左一個是日燉湯試試。真係不得了，如果大家去食，一定要叫呢個燉湯，因為呢個湯係不落味精，用原食材燉出黎！

而當日係蟲草花燉瘦肉螺片，第一啖飲落口就已經真係知道係咪無落味精。。。真係不得了，啖湯鮮甜清香，d渣都唔會話燉到un曬。宜家係出面餐廳食野飲既湯真係已經好難搵到唔落味道禁煲架了，所以呢個真係好難得好有驚喜。呢個湯性價比極高，如果10分係滿分，真係要比12分佢先交代到。

<蓮藕煎肉餅 $78>

呢個係唯一一道當晚所選既香口煎炸菜式，話曬餐廳主打既都係蒸煮菜式。不過呢個真係可以話普通得黎又好食，佢得煎炸可口，唔會太油膩，蓮藕係入面就做到個肉餅爽口，唔錯👍🏿

<三色拼盤 $108>

呢個冷盤拼盤都有驚喜，三樣野都整得好好食，特別係個花雕鴨舌，因為佢個花雕味好重，愈食個鴨舌佢個酒味就愈濃愈重👍🏿

<龍仔蒸斑頭腩 $138, 加飯底 +$20>

小編比較唔中意出街食魚，因為成日都怕梗到魚骨，但心諗黎到呢度，呢度菜又係佢既主打菜，禁就即本試試！呢個斑頭腩佢又好細心禁選擇左d唔多骨既部份(因為我食過有d斑頭腩真係好多骨。。)，味道方面，因為蒸而調味料唔多既情況下，完全可以食出魚既鮮味，再食埋下面個飯底，個飯都吸收埋上面既鮮魚汁味，成件事搞到好夾之餘，食落係好滿足的。