渡船角海鹽燒 (佐敦) - 食串燒好地方 食完想再食
今日小編同一位友人新嘗試，嚟到呢間食串燒嘅餐廳食飯。由於小編都幾鍾意食串燒，所以其實都幾期待，而佢呢間餐廳就坐落於佐敦渡船街，呢個餐廳非常多嘅美食區入面。因為小編怕無位，所以預先book左枱，八點半準時入座，入到去場內都幾鬆動，唔會話相當擠迫。
之後就開始睇Menu，見到佢其實都好多選擇好多嘢食，有雞豬牛羊，菜烏冬飯豆腐，以至佢嘅賣點之一，蠔！真係搞到有好嚴重嘅選擇困難症。
呢度點餐嘅方法都幾特別，就係由食客親自落單親自寫底想點啲乜嘢食同份量，所以我諗真係要搵個首字寫得靚靚嘅人黎負責寫啦。其實呢個方法都好嘅，因為避免有啲客人賴皮話無order過呢d食物👍🏿又可以比客人有少少責任👍🏿
好！order完之後第一樣上枱嘅嘢就係青島啤酒哈哈。本身啤酒係平平無奇，但驚喜就係餐廳會雪凍左隻杯比客人，呢樣又係唔係間間餐廳都唔會咁做嘅，所以呢到驚喜得來又加左分啦😀
嘢食上枱啦，第一樣嘢嚟嘅就係燒蠔！係小編同友人最愛，亦係餐廳其中一主打菜既生蠔！不得了！落咗order之後隔咗大約5分鐘，其實佢都已經開始慢慢上菜，串燒來講速度都真係幾快。
講番啲蠔，真係要整返張close up。佢個蠔好新鮮好入味，由於佢攞order一叫就要叫六隻，而餐廳亦都好好咁可以俾客人叫兩款唔同既味道，所以小編就帶咗一款係蒜蓉一款係黑椒。而小編比較喜歡嘅係黑椒味，因為黑椒味相對比較適中，可以突顯出號蠔鮮甜，蒜蓉其實都唔差只係可能蒜蓉太重口味遮蓋左蠔嘅本身個特質。所以呢個果然係佢餐廳其中一個主打菜。
食串燒又點可以唔食菜呢，燒翠玉瓜真係好好食，佢燒得唔會太林又唔會太硬，加上海鹽嘅配合，味道啱啱好真係好好食！
呢個又係正嘅，好一串燒雞皮。叫之前其實都好擔心會唔會好肥膩，但食落係好好味好味到不得，因為佢整到個雞皮有少少燶嘅感覺，你又係加埋海鹽嘅配合，未到絕對唔會太鹹，啱啱好， 真係食多兩串都唔會覺得肥。
大大隻扇貝冇理由唔想食掛！一食落口先甜嘅扇貝汁，就好似飲啖湯先，再食埋佢個扇貝，啖啖肉，真係比120分佢！高度強烈推介👍🏿👍🏿
都係果句，食禁多肉，點都要食d菜既。所以我地都叫左個燒野菜錫紙包。都唔錯既，味道淡淡地，清淡少少就中和返較為重口既串燒們。不過就覺得如果d菜唔剪到禁散禁細粒就好了👍🏿
可能大家去食日式放題宜家都會有羊架食，不過如果講質素，禁就真係無得比了！佢呢個係大size既羊架，其實佢已經唔算大，所以我諗如果叫細size ,真係會比較細。至於味道，個味道唔會太so得黎又有啲羊味，連唔係太食羊嘅小編，都食得津津有味！因為其實羊架要燒得好食真係唔易做，但係正正佢就真係做得好好👍🏿👍🏿
總括而言，小編真係推薦呢間餐廳，啱晒鍾意食串燒嘅朋友，而兩個人平均嘅消費係大約每人＄200左右，唔係太貴但係就可以食到高質素嘅串燒，所以大家不妨試試。相信大家都一定會食過返尋味😋👍🏿
沒有留言:
張貼留言